Pse adresa @gmail.com po të dëmton biznesin

Mendoje për një çast. Të vjen një ofertë nga kompania.juaj@gmail.com dhe një tjetër nga shitje@kompania.al. Cilës i beson më shumë para se të hapësh fare mesazhin?

Përshtypja e parë formohet që te adresa. Dhe një adresë @gmail.com ose @hotmail.com te një biznes thotë, pa dashje, “ende nuk e kemi marrë seriozisht këtë punë”.

Çfarë humbet me një adresë falas

Nuk është thjesht estetikë. Një email me domenin tënd të jep disa gjëra që një adresë e zakonshme s’i jep:

Besueshmëri. Klienti sheh emrin e biznesit, jo një adresë personale të improvizuar.
Kontroll. Nëse largohet një punonjës, adresa info@biznesi.al mbetet e jotja. Adresa e tij personale në Gmail ikën me të.
Reklamë falas. Çdo email që dërgon e përmend emrin e domenit tënd. Çdo email nga Gmail reklamon Gmail-in.
Adresa sa të duash. info@, shitje@, fatura@, të gjitha pa paguar për llogari të reja.

Pjesa që pothuajse askush s’e di: dorëzimi

Këtu bëhet interesante. Nuk mjafton thjesht të kesh një adresë me domenin tënd. Domeni duhet edhe i konfiguruar si duhet, përndryshe email-et e tua mund të përfundojnë në spam, ose dikush mund të dërgojë email që duket sikur vjen prej teje.

Pa hyrë në detaje teknike, ka tri rregjistrime që duhen vendosur te domeni:

SPF: thotë cilët serverë kanë të drejtë të dërgojnë email në emrin tënd.
DKIM: vendos një “nënshkrim” që vërteton se email-i s’është ndryshuar rrugës.
DMARC: u thotë serverëve të tjerë çfarë të bëjnë me email-et që dyshohen si të falsifikuara: t’i lënë të kalojnë, t’i çojnë në spam, apo t’i refuzojnë fare.

Pa këto, dy gjëra ndodhin. E para, email-et e tua legjitime shpesh bien në spam, sepse Gmail-i e Outlook-u s’kanë si t’i besojnë. E dyta, kushdo mund të nisë mesazhe që shfaqin adresën tënde si dërgues, mashtrime që u vijnë klientëve të tu, në emrin tënd. E kemi parë nga afër: pa një politikë DMARC të rreptë, email-et e falsifikuara kalojnë më leht.

Si të kalosh, hap pas hapi

Lajmi i mirë: kalimi është më i thjeshtë nga ç’duket dhe nuk kushton shumë.

Sigurohu që ke një domen. Nëse ke faqe, ke domen. Nëse jo, regjistroje i pari. Është themeli.
Zgjidh një ofrues email-i. Google Workspace dhe Microsoft 365 janë klasikët. Ne shpesh rekomandojmë Migadu ose ofrues të ngjashëm për biznese të vogla: çmim i drejtë dhe pa pagesë për përdorues.
Konfiguro domenin si duhet. Këtu hyjnë SPF, DKIM dhe DMARC. Ofruesi të jep vlerat; ti (ose ne) i vendos te DNS-ja.
Kalo adresat ekzistuese. Vendos një ridrejtim nga adresa e vjetër te e reja për një periudhë, që të mos humbasësh asnjë mesazh.

Hapi 3 është ai që anashkalohet më shpesh, dhe pikërisht ai përcakton nëse email-et e tua arrijnë apo jo. Nuk është punë e madhe, por do bërë me kujdes.

Ia vlen?

Për disa euro në muaj, marrësh një adresë që ngjall besim, që e zotëron vetë, dhe që, e konfiguruar mirë, të mbron nga mashtrimet dhe nga filtri i spamit. Për një biznes që komunikon me klientë me email, kjo s’është shpenzim. Është nga investimet me kthimin më të shpejtë që mund të bësh.

Nëse do ndihmë për ta ngritur email-in profesional dhe për të rregulluar SPF/DKIM/DMARC si duhet, na shkruaj . E bëjmë pjesë të çdo projekti faqeje, ose veçmas nëse e ke faqen gati.